Watter ongelooflike atletiekjaar het Gimmies weereens op die atletiekbaan beleef. Atletiek is weer vanjaar die skool se spogsport. Reeds die laaste 20 jaar word Gimmies as die top atletiekskool in Noordwes beskou. Dié spogsport was al vele kere in die verlede beskryf as: “kweekplek van kampioene, medaljefabriek, mekka van atletiek” en vele meer.

By Gimmies het vele meisies en seuns met ʼn vonkel in die oog, ʼn drif om hard te werk of ʼn passie vir prestasies, onder leiding van uiters knap afrigters, gegroei tot nasionale medaljewenners of tot uiters gemotiveerde of begeesterde interhoërwenners. Vele opkomende atlete het hiér die vreugde van atletiek ontdek wat ʼn nuwe wêreld vir hulle oopgemaak het.

Ons prestasies spreek vanself. Vanaf 1991 wen ons die interhoër 24 uit 25 keer. Vanjaar is daar vir die eerste keer ’n Noordwes-Interhoër met die borgskap van school sports wat al die sterkste skole in Noordwes bymekaar gebring het. Die skole wat betrokke was, is: Klerksdorp Hoërskool, Wesvalia, Volkskool, Lichtenburg, Rustenburg, Diamantveld, Girls High en Boys High. Hierdie skole moes almal die knie teen Gimmies buig. Gimmies het die algehele wentrofeë verower.

In die laaste tien jaar het ons 320 atlete gehad wat gaan deelneem het aan die SA-Skole- en SA-Junior- en Jeugkampioenskappe. Ons medalje-oes is briljant en in hierdie tyd verower Gimmie-atlete 130 medaljes wat 28 goud, 52 silwer en 57 brons insluit. Verseker die beste vir ʼn plattelandse skool in SA.

Vanjaar het ons weer ’n SA-kampioen, Karmen Fouche. Onder leiding van mnr. Marx skitter sy in die hoogspring. Karmen verower ook silwer in die verspring in die o/15-afdeling. Sy word in die Suid-Afrikaanse span vir die Southern Region-kampioenskappe ingesluit. Ongelukkig onttrek die skoleliggaam die SA-span. Miandi van Staden (nog o/16) verower brons in die 100m, brons in die 4x100m aflos en goud in die medley aflos. Elri Prinsloo (o/15) verower silwer in die 5km stap. Gimmies was vir jare die toonaangewers in dié item in SA. Danielle Verster blink in die o/15-afdeling in die 1500m uit met ’n skittertyd van 4:37.77 en verower ’n bronsmedalje.

Vanjaar was ons uiters knap span afrigters:
Arnold v.d.Merwe (atletiekorganiseerder/afrigter lang- & middelafstande) Tommie Ferreira (hekkies en naellope), Werner Burger (naellope, spronge), Isabel Campher en Johan Benson (hekkies), Rudo Klopper (spiesgooi), Martin Marx (hoogspring), Chris Conradie (hamergooi) en Alicia Bruwer en John Ross Jackson (diskusgooi en gewigstoot).

Gimmies begin reeds op 13 Augustus atletiek oefen. Enige voornemende Gimmie is baie welkom om saam by Mooivallei-sportgronde te kom oefen.
 

   
   
   
     
   
 

 

 
 

Die webtuiste is ontwerp en word met trots onderhou deur GSD Potch - The WEB mense...  - www.gsdpotch.com